[美食推介系列] 元朗 印尼美食
元朗國多地鋪就係人都知，其實元朗國亦都有好多少數民族聚居，可能大家都見識過合益一帶既「小印度」，如果怕個度治安唔好既，其實靠近返朗屏西鐵站一帶，都一樣可以食到d稍為平價既東南亞美食。
呢間印尼美食，咁就當然係食印尼野啦，都見好多印尼藉既姐姐幫襯，不過呢，又好好彩，店員 (定係老闆娘呢) 係如假包換既華人，同大家一樣都係講緊一口流利既廣東話，絕對唔洗話溝通唔到，同埋佢都可以介紹到各種野食既特色比你知，只係地方淺窄，堂食既話要將就下。
我個人比較推介佢既黃薑飯同埋巴東牛肉飯，前者呢，可謂一個大雜錦，黃薑飯固然係主體，但周邊亦有少量巴東牛肉、茄子、魚仔花生、雞翼等等，各樣野就咁食都好好味，送飯就更一流，而個巴東牛肉飯就簡單d，個醬料十分入味，香料味都重既，但正正係我鐘意既野，雖則我唔好辣野，但能夠係寒冷天氣下食兜辣得黎好食既野，都係一種享受。
野飲方面就唔介紹太多喇，總之+9蚊就杯特飲，唔算好特別，就此從略。
(另外有次我試過一個椰汁雜菜配米糕，食落去好似喇沙，不過米糕完全無味，只可以話，我唔識欣賞人地既家鄉風味 —— 呢個我無影相既)
地址: 元朗安寧路70-74號保輝樓地舖
食物: ★★★☆
價錢: ★★★☆
環境: ★★
服務: ★★★☆
性價比: ★★★
Search